Երիտասարդ հայ ընտանիքների 17 տոկոսը անպտղության խնդիր ունի:
Հայաստանում վերարտադրողական տարիքի ընտանիքների 17 տոկոսին չի հաջողվում երեխա ունենալ: ՄԱԿ-ի բնակչության հիմնադրամի հայաստանյան գրասենյակի տվյալներն են: Գրասենյակի գործադիր ներկայացուցիչ Գարիկ Հայրապետյանը նշում է, որ առաջնային անպտղության, այսինքն` նորմալ ամուսնական հարաբերությունների պայմաններում չգրանցվող հղիության խնդիր ունի երիտասարդ հայ ընտանիքների 5 տոկոսը, իսկ երկրորդային` 12-ը: Անպտղությունը երկրորդային է կոչվում, եթե դրան նախորդել է գոնե մեկ հղիություն` թեկուզ չզարգացող: Հիմնական պատճառները երկուսն են` սեռավարակներ եւ աբորտներ:
Գարիկ Հայրապետյանն ասում է, որ եթե հասանելի լինեն հակաբեղմնավորիչները, կկանխվի նաեւ անպտղության դեպքերի մի մասը: Իրազեկված լինելն ու խնդրին գրագետ մոտեցումը կօգնի նաեւ այս դեպքում, համոզված են մասնագետները: Եվ որպեսզի գործը չհասնի արհեստական թանկարժեք ճանապարհներով երեխա ունենալուն, պետք է պահպանել սեռական հիգիենայի տարրական կանոններն ու հետեւել սեփական վերարտադրողական առողջությանը` տարին գոնե մեկ անգամ համապատասխան մասնագետի մոտ այցելելով:
Հեղինակ` Կարինե Հարությունյան
Աղբյուրը` http://www.armnewstv.am/